بعيش أوقــــات

-
ده بوست الفالنتين .. اللى مش هيختلف كتير عن اي بوست تاني في مدونتي .. لأن فكرة الاحتفال بيوم للحب في حد ذاتها مش بتجذبني .. وبحس بالهيافه إني انزل اشتري دبدوب أحول أو قلب عنده كرش عشان بس احنا الفالنتين .. لكن هحاول أوصل لمعنى اليوم ده زي ما بحسه أنا .. لأنه في النهايه يوم كل الناس حواليك بتعيشه .. عجبك أو معجبكش .. يمكن لأني متأكد إن عمرك ما هتحب حد أكتر في يوم , عشان بقه اسمه عيد الحب .. لكن كفايه انك تقيم مشاعرك وقصة حبك في اليوم ده .. لما تشوف الناس حوليك يا إما بيجروا يجيبوا هديه تحسسهم إنهم بيحبوا .. يا إما مكتئبين وعابسين لأنهم مش عايشين في قصه الحب .. عشان كده حسيت أن يوم الفالنتين ده .. لما هعيشوا وأحسه في يوم من الأيام .. مش هيكون إلا فرصه تحسسني بقيمة وجود قلب في حياتي .. ويعني إيه ربنا إداني إنسانه أحبها .. وقلب يشاركني كل اللى جوايه .. حزنى وفرحي .. يعني إيه ربنا أهداني توأم لروحي
-
-
-

-

جميل إنك تحس إن ربنا بيهديك في كل يوم هديه جديده

-

والأجمل إن ربنا يهديك شخص واحد يغير حياتك .... شخص واحد بس يكون هوه في حد ذاته هديه متجدده في كل يوم .. هديه تستحق إنك تشكر ربنا عشانها كل يوم ألف مره .. هديه تستحق إنك تبطل عشانها كل حاجه وحشه ممكن تكون بتعملها .. هديه تخليك مكسوف من ربنا وإنت بتعصيه .. هديه تخلي إيمانك بربنا أقوى من أي وقت تاني .. لأنك حسيت قد إيه ربنا بيحبك أوي .. و حاسس بيك دايما .. و على عكس ما بنتوقع إننا مظلومين و محدش بينصفنا .. بتيجي هدايا ربنا في كل لحظة و كل وقت .. تجدد جوانا أمل كان على وشك أنه يموت

-

جميل إن حد يهديك هديه .. وتحس أنها كانت نقصاك .. إنك بجد تحبها

-

والأجمل إن الهديه دي تكون فعلا ملاك من السما .. بتحب كل حاجة فيه .. بتتقبل أي حاجه منه .. بتحبه بكل لحظة عشتها معاه .. أو حتى بتفكر فيه .. مبتقدرش تشيله من بالك ثانيه واحده .. عارف إنك بيه كل حاجه .. و من غيره ولا حاجه .. والاهم إنك تحس في لحظة إنه بيحبك زي ما بتحبه .. ولو حتى جزء من حبك ليه .. إنه عايزك زي ما إنت عايزه .. إنكو دايما في قلب واحد .. بتلاقيه في كل حلم بتحلمه .. وعارف إنك مش هتعيش إلا وهوه معاك

-

جميل إنك تحس كلمات أغنيه أوي .. بعيش أوقات

-

وبعيش أوقات .. طول ما انت بتبقى معايا هنا

لو عمري ساعات .. دي كفايه مادمت حبيبي أنا

-

ياللى لقيتني معاك .. حبك غير أيامي

قد ما أقول بهواك .. بتمنى تكون قدامي

-

ياللى معاك العمر الجاي .. قبلك عمري انا مش فاكراه

انت حبيبي ومالك زي .. عشت في حبك أحلى حياه

-

قرب لي كمان .. حسسني بحبك تاني كده

لا في قلبي مكان .. لجراح ولا شوق ولا حمل كده

-

ليله في حضنك ياه .. بالدنيا وكل ما فيها

هي حياتي حياه .. لو لحظة تكون مش فيها

-

-

-

جنات .. بعيش أوقات

-

-

ملاحظة : أكيد في ناس كتير مسمعتش الأغنيه دي لأنها لسه جديده , عشان كده أنا رفعت الاغنيه للى حابب ينزلها ويسمعها لأن الكلمات مهما انكتبت متساويش حاجه جنب الاغنيه بأحسيسها وألحانها
تحميل الأغنية
تحديث : الأغنية طلعت بتاعت .. دنيا سمير غانم .. عشان محدش يزعل

-