-كان صعب عليك .. تقولى حبيبي انك حبيتنى
كان صعب اكيد .. تشوف الحب فى عيني كده وتسيبني
-
ولا كل كلام الحب اللى انا عشته ... علشانك جه يوم حسيته
ولا كل الشوق اللى بيسبق .. قلبي ويجيلك حبيته
ولا كل دموعى عليك .. وليالي سهر بناديك
و آهات قلب بيشكيك
هتقولك ايه بيـّــه
-
ولا كل كلام الناس اللى شافوني .. حسو بحناني وعرفوني
ولا كل حكاوي اللى لاموني .. هتنسيني ان انت عيوني
ولا كل الشوق لعنيك .. أحلامي انى الاقيك
و اللهفه حبيبي عليك
توصف حبك فيــّه
-
-
طنطاوي
-
6 comments:
ايه دا كله .. تصدق الرومانسيه حلوه برضو مايضرش يعني :)
ايه حكايه الاغانى معاك الهام الاغانى شغال الله ينور
ربنا يلهمك ويوفقك ونعرف مين اللى مزوده الهامك اليومين دول
انا كتبتلك سؤال فى بوست الكنيلونى ومردتش عليه يا دكتور
rara
-----
الرومانسيه طول عمرها حلوه برضه .. اتفضلى شويه هههه
calm cat
--------
لا الهام ولا يحزنون .. اهه نوع من انواع التغيير ههههه
طنطاوى انا بقالى اكتر من سنة متابعة مدونتك
عايشة مع كل الكلام اللى فيها
ومش انا بس .. دا انا زى منا شايفة انه فيه ناس كتير بتحب كلامك عشان بيصحى جوانا حاجات حلوة كتير
لدرجة ان معظم الناس مش بتصدق ان فيه حد لسه جواه الاحاسيس الحلوة دى و بيفكر فى الحب بالطريقة دى وان كلامك لا يتعدى خيال الشعرا والفنانين اللى شايفين الدنيا وردى
وكانت دردوك على كل الناس دى انه لأ .. فيه ناس كده والحاجات دى حقيقية وموجودة فى عالم البشر بس انتوا لسه مصادفتوهاش
كلامك بالثقة دا خلانا فهمنا انك حد عايش التجربة وفعلا بتحب بالشكل دا
وخلانا وثقنا وصدقنا وبصمنا بالمية وعشرين ان الدنيا فيها حب من النوع دا
طبعا لما تيجى انت تقول بمنتهى البساطة فى تعليق ردا على احدى التعليقات ان دا لا الهام ولا حاجة ودا مجرد نوع من انواع التغيير
يبقى لازم نقف شويه ونسكوب على حاجة زى دى
مش تدخل فى حياتك الشخصية
وانما بصفتنا ناس صدقناك
واتعمل لنا غسيل مخ بكلامك
وبقينا ننام ونصحى نحلم بالحب الرومانسي الفوق الفظيع اللى عمال تتكلم عنه دا
جاى كده بكل بساطة تقول دا مجرد تغيير
جملة زى دا معناها كذا حاجة
اولا : ممكن تكون انت بتحب فعلا ومش عاوز تقول دا قدام الناس لاعتبارات شخصية
بس ساعتها اسمحلى اقولك ان لو كان كل الكلام دا لحبيبتك بجد وهيا قرت جملة زى دى فدا كفيل يوقعها من فوق السما لتحت الارض وخد عندك اى كلام ممكن تقوله عليك
وساعتها يبقى عندها مليون حق انها فعلا تصدق انك مش بتحبها
اسمحلى بقى ساعتها اقولك ان كل تعبك اللى بتعمل فى كتابة بوستات جميلة كده تقرب بينكم وتقوى العلاقات بينكم .. ويوصلها مشاعرك .. كل دا بيروح فى الهوا لانها خلاص ممكن متصدقكش بعد كده
انا فى رأىى اللى بيحب بيقف يتحدى الدنيا كلها ويقول انا بحب ومش بيهمه حد .. انما الخوف والهروب دا فى حد ذاته ضعف .. وافتكر كلام انت قلته زمان عن ان اللى ميعرفش يحمى حب حياته يبقى ميستاهلوش ويبقى ميستاهلش الحب اصلا
ثانيا : ممكن تكون فعلا مبتحبش حد وبرده لازم تقولنا لاننا ساعتها لازم نفهم ان دا كله خيالات واحد بيحب الحب وبيتمنى دنيا جميلة
فنقوم نرجع لدنيا الواقع ومنتعشمش ان الدنيا فيها حاجات كده .. مش هنزعل منك ولا نقاطع مدونتك بس هناخدها على انها دنيا من الاحلام الجميلة بنيجى نرتاح فيها من قرف الواقع وقسوته
ويبقى واجبنا ننصحك ونقولك متعش فى الاحلام كتير عشان متتصدمش فى الواقع لانك لو فضلت مصدق وجود مثل هذا الحب اللى بتدفق مشاعر واحاسيس وتضحية يبقى عمرك ما هتحب ولاهتتجوز لانك هتفضل بصورة ملهاش وجود غير فى خيالك وبس
وطبعا النصيحة دى من منطلق انك مدون عسل واحنا بنحب نقرالك وقربنا منك جامد ويهمنا مصلحتك
الحاجة الاهم انك دايما بترد على التعليقات بطريقة كلها غموض او تريقة وضحك وهزار او بتتجاهلها خالص
يعنى اللى بيعلق عندك مبيطلعش منك بحاجة مفيدة
وبكده يبقى انت لغيت الهدف الاساسى من التعليقات اللى هو المناقشة والحوار .. يبقى تقفلها زى زمان احسن
انت فى البوست بتطرح قضية والناس تناقشك فيها وترد عليهم لغاية ما توصلوا لحاجة مفيدة يا تقتنع بيهم يا يقتنعوا بيك
انما انت عامل زى اللى بيفجر قنبلة ويرميها ويجرى
تطرح على القارىء مشكلة مهمة وتفتح فى دماغه سكة لمليون سؤال
وفى الاخر لو القارىء فكر مجرد التفكير بينه وبين نفسه انه يسألك يبقى غلط غلطة عمره
لانك بردك على التعليق بتزود الغموض
او بتسيبه معلق
او تقعد تكلم كده يمين وشمال ومنطلعش منك بحاجة
كأنك بتعاقبنا اننا بنيجى المدونة تاكسى رايح وتاكسي جاى واتنين كيلو فاكهة فى كل مرة وفى الاخر نتنكد ونمشي
المبدأ دا انت ماشي عليه حتى فى بوستاتك
تطرح مشكلة .. وتسيبها متعلقة وتمشي
متقفلش الاحداث ولا تنهى الموضوع نهاية مقنعة وانت معتقد ان دى نهاية مفتوحة
النهاية المفتوحة ليها اصول
واسلوب الكتابة عموما ليه اصول
من اهمها انك بتبدأ الكتابة بسؤال او مجموعة حاجات غامضة وبعدين تبدأ بسردك للاحداث تزيل الغموض عن احداث القصة او الموقف وتوضح اسباب اللبث والغموض والتشابك .. وفى الاخر بتحط نهاية تبين بيها تخيلك للموضوع او بتسيب الموضوع مفتوح لينا احنا نتخيل
انما انت اللى بتعمله اننا فجأة نلاقى نفسنا جوه موقف .. منعرفش اصلا مكوناته ولا ظروفه ولا تشابكاته
وتفضل تتكلم عن الموضوع وتعقد فيه وتسيبه معقد وتمشي
مرة واحدة سألتك عن معنى جملة فى بوست قلت لها خليها سر بقى
عامل زى واحد عمل فيلم فيه جريمة قتل وطول الفيلم عمال يعقد الاحداث ويشاور بأدلة الاتهام على كل افراد الفيلم وفى الاخر ساب النهاية مفتوحة ومقالش مين القارىء
حاجة زى كده كفيلة انه تحرق دمك الماهد مهما حب الفيلم او حب الكاتب والابطال والقصة
كأنك بتفرض علينا افكارك فرض واحنا لازم نقبلها زى ما هيا كده
هتقولى دى مدونتى وانا حر وبكتب لمزاجى .. هقولك برده تقول .. وتفهم الناس انت بتعمل ايه
بلاش اسلوب الديكتاتورية دا كأنك بتقول انا صاحب الكلمة الاولى والاخيرة هنا ومفيش رأى هيتقال غير رأىى
دى نصيحتى ليك لو ناوى تحترف الادب
انا مثلا معنديش استعداد ادفع فلوس واكلف نفسي عشان اشترى كتاب لكاتب يحرق دمى ويخلينى ابات متنكدة لانه قلب عليا مثلا ذكرى رخمة او حطنى قدام نفسي فى موقف وحش او عقدلى مشكلة وسابها من غير حل
احنا بنشترى كتب ونقرا افكار الناس عشان نستفيد منهم ونضيف لخبراتنا حاجات جديدة .. خاصة لو الموضوع فيه تفاعل مع الشخص اللى طرح الفكرة وعالجها
ابسط حاجة هعملها انى لما اشوفله كتاب تانى هبعد عنه ولا هكلف نفسي ولا اشتريه
انت فعلا اسلوبك حلو
واختيارك للصور الرائع
وافكارك عن الحب مجنونة ورائعة
بس عندك حبة حاجات انا شايفة انها لازم تتعدل
ارجو ميكونش كلامى دايقك
انا فعلا بحب مدونتك برغم كل الحاجات اللى قولتهالك دى
وبزعل وبدايق لما بتتأخر فى البوستات
برغم انك ساعات كتير بتتبع معايا اسلوب الدكتاتورية بتاعك فى التعليقات
يعنى متردش على التعليق
او ترد تتريق وتهزر
او ترد على حتت وحتت لاء
او بترد عليا بطريقة اننا فى حرب كلامية
الفكرة ابسط من كده بكتير
انا بقول رأى وانت من حقك تقبله او ترفضه .. مفيش داعى للاستفزاز او التحفز فى الرد
تحياتى
m&m
أولا شكرا على التعليق الطويل ده
ثانيا آسف بس واضح انك فهمتى كلامي غلط وطلعتي كل النقد اللى جواكي من قبل كده حتى على اساس فهمك للكلمه دي :) .. انا قلت فى ردي على التعليق ان كتابة ( الاغاني ) هيه اللى نوع من انواع التغيير لأني كتبت كذا واحده ورا بعض .. بعد ما كنت بكتب بوستات قصص او خواطر عاديه .. اكيد مش قصدي ان المدونه كلها والرومانسيه هيه اللى نوع من التغيير والا يبقى تعاملى مع الموضوع تعامل بدائي او لاانساني بالمره .. ولا اعتقد اني من النوع ده من الناس .. والله اعلم
اكيد اللى بيكتب حاجه لازم يحسها ويعيشها والا مش هيعرف يوصفها بصدق .. الواضح انك تحفزتى واخدتي موقف من قبل ما تقري كويس وتحاولي تفهمي كلامي
ثالثا و ده الاهم .. انك تقولي
(( الحاجة الاهم انك دايما بترد على التعليقات بطريقة كلها غموض او تريقة وضحك وهزار او بتتجاهلها خالص
يعنى اللى بيعلق عندك مبيطلعش منك بحاجة مفيدة
وبكده يبقى انت لغيت الهدف الاساسى من التعليقات اللى هو المناقشة والحوار .. يبقى تقفلها زى زمان احسن
))
فأنا آسف لو كان ردودي على التعليقات من وجهة نظرك هايفه و مبتتطلعيش منها بحاجه خالص ... بس انا لما الاقى حد كاتب تعليق يقولي انت كويس او شغلك حلو او مش عارف ايه .. مش المفروض اقوله شكرا جزيلا و تحياتي وخلاص .. فى تعليقات اسمها (مجامله) و دى معظم التعليقات اللى بتجيني .. انما لما تعليق بيبقى فيه (نقد حقيقي) لحاجه انا كاتبها مش برد عليها بسخريه و تهكم زي ما بتقولي بالعكس بحترمها و بقدرها .. لان الغرض الاساسي من التعليق هو احتكاك بينك و بين القارئ .. ينقد اعمالك و تردي عليه لحد ما حد يقتع ... عمر التعليق ما كان كلام مديح و مجاملات و ردود بارده ملهاش لازمه ... ولا أنا غلطان ؟؟؟
رابعا .. ومن غير زعل ؟؟ هوه انتى شايفه انك حاليا مؤهله لانك تعلميني اصول الكتابه و النهايات المفتوحه والمغلقه ؟؟؟ بغض النظر عن فرق الخبرات فى الكتابه فأنا عمري ما قلت اني كاتب محترف علشان اكتب بوستات خبير يعني .. مدونتى ما هي الا نوع من التنفيس عن حاجات جوايا مش اكتر ولا اقل .. طبعا انا اعتراضى على كلامك فى النقطه دي هيه انك حكمتى نفسك خبيره فى الروايه و بدأتي تحاسبيني على الاساس ده .. مع انك حسب علمي لسه موصلتيش للمرحله دي وان كنت لا انكر ان اسلوبك اتطور كثير جدا فى فتره قصيره ويمكن تكونى فى حاجات كتير سبقتيني اوي اوي وبهرتيني اكتر ... لكن ده برده ميبررش النقد القاسي ده لأنى عمري -واتحدي- ما قلت اني اديب او كاتب او شاعر .. وعمري ما فكرت مثلا اعمل كتاب وابيعه لاني عارف ان اللى بكبته حاجه تخصني انا بس وميهمش حد انه يقتنيها .. ويمكن ده اهم سبب انها لسه باسلوب الهواه البدائي البسيط .. أللى انا بعتبره احلى حاجه فى اسلوبي .. حتى لو كان ده اسلوب جديد انا اللي مخترعه وماشي عليه لوحدي .. عشان كده بقولك متحاوليش تفرضى عليه تهمه و تحاكميني على اساسها .. اتهمتيني اني ( دى نصيحتى ليك لو ناوى تحترف الادب
انا مثلا معنديش استعداد ادفع فلوس واكلف نفسي عشان اشترى كتاب لكاتب يحرق دمى ) مع اني عمري ما فكرت ولا هفكر اعمل كده .. حتى يوم ما جمعت شغلى فى كتاب احتفظت بيه لنفسي .. لأني زي ما قلت مش كاتب المدونه دى عشان اوزعها على الناس وافرح بيها .. بالعكس .. اللى يهمنى ان كلامي يوصل والناس تحسه .. وعشان كلامي يوصل عايز اللى حابب يشوفه يدخل على المدونه .. يتعب شويه عشان يقراه .. ميبقاش حاجه سهله اتجمعت فى كتاب ويقدر بفلوسه يشتيريها و يملكها .. ياريتك تكوني فهمتى النقطه دي كويس
شكرا مره تانيه على التعليق وعلى وقتك واهتمامك انك توصليلى حاجه زي كده بس ياريت المره الجايه تحاولي تتأني شويه وتفهمي التعليق قبل ما تقريه .. واضح من تعليقك انك متابعاني كويس وبالتالي كان الاولى انك تفهمي الجمله صح متفهميش اني بكتب البوستات دي كنوع من التسليه او اللعب .. تحياتي
مقولتش خالص أن ردودك هايفة.. بالعكس ليك اراء كتير جدا بتعجبنى وبعتز بيها ..انا قلت انت بترد بغموض وبتوه بضحك وهزار عشان متجاوبش .. ودا كله بيوصل اللى قدامك - من غير منت تحس - انه دمه يتحرق .. واكيد يعنى مقصدش ان دا بيحصل دايما .. وكون يبقى عندك كتاب الناس تشتريه دى حاجة تسعدنى .. اللى انت متعرفهوش انى طبعت جزء كبير من بوستات المدونة دى وحطيت لهم الغلاف اللى انت صممته عشان يبقى عندى الكتاب ..فاكيد مقصدش خالص اقلل من شأن كتاباتك بالعكس انا بتعلم منك .. بس انا كل كلامى كان بيدور حوالين الغموض اللى بيأذينى انا شخصيا
Post a Comment